Vahid Milli Hərəkat Partiyasının sədri Nika Meliyanın həbsi səhv addımdır. Onun həbsi etirazları gücləndirəcək.

Bu sözləri Axar.az-a “Atlas” Araşdırmalar Mərkəzinin rəhbəri, politoloq Elxan Şahinoğlu Gürcüstan Vahid Milli Hərəkat Partiyasının sədri Nika Meliyanın xüsusi əməliyyat nəticəsində saxlanılmasını şərh edərkən deyib.

O bildirib ki, Gürcüstan Vahid Milli Hərəkat Partiyasının sədri Nika Meliyanın həbsi gözlənilən idi:

“Çünki Gürcüstanda keçirilən parlament seçkilərindən sonra müxalifət yeni parlamentin tərkibində yer almadı. Bu hal Gürcüstanda gərginliyin artacağının mesajını vermişdi. Ölkədə müxalifətin aksiyaları başladı, bu mitinqlər zamanı hakimiyyətin ünvanına ağır ittihamlar irəli sürüldü. Bu mənada mitinqlərdən sonra əsas müxalif partiyanın rəhbəri Meliyanın həbs edilməsi təəccüblü deyil”.

Politoloqun sözlərinə görə, eks-prezident Mixail Saakaşvili də Gürcüstanda baş verən mövcud siyasi prosesləri yaxından izləyir:

“Hiss olunur ki, Gürcüstanda bir siyasi xaos yaşanır. Digər tərəfdən, Gürcüstanda Baş nazir və digər şəxslərin istefası mövcud xaosun gərginləşməsinə gətirib çıxarıb. Qaxariya Meliyanın həbsinin əleyhinə idi.

Əslində Qaxariyanın bu cür mövqe sərgiləməsi hakimiyyət içərisində yekdil bir fikri olmadığını göstərir. Belə vəziyyətdə ya xaos bir müddətdə davam edəcək, ya da hökumət çıxış yolu kimi erkən parlament seçkilərinə gedəcək. Yeni Baş nazir növbəti parlament seçkilərinin keçirilməyəcəyini bildirib. Ümumiyyətlə, belə bir seçkilər olsa belə, xaos bir müddət davam edəcək”.