AKP-MHP koalisiyası hazırda ən mümkün ittifaq kimi görünür.

Axar.az xəbər verir ki, bu açıqlama ilə politoloq Natiq Cəfərli çıxış edib. Ekspert hazırda koalisiya mərhələsini yaşayan Türkiyədə mümkün ittifaqlaşma ilə bağlı bəzi məqamlara aydınlıq gətirib:

"AKP və MHP seçim profili bir-birinə çox yaxındır, ümumi dəyərləri çoxdur, amma belə bir ittifaqın yaranması üçün AKP ciddi şəkildə geri addım atmalıdır:

1) Ərdoğan öz sarayına çəkilir, siyasətə qarışmır;

2) "Kürd açılımı" məsələsi gündəmdən çıxır.

Əgər bu şərtlərlə MHP koalisiya ortağı olsa, AKP kürd səslərini tam itirəcək və onlar HDP-yə daha sürətlə keçəcək, MHP isə əksinə, güclənəcək. İqtidar ortaqlığının verdiyi avantajlarla növbəti seçkilərdə AKP-dən milliyyətçi səsləri daha rahat qoparacaq. Belə bir koalisiya CHP-ni də gücləndirəcək. CHP ana müxalifət rolunu istifadə edərək tənqidini və ritorikasını sərtləşdirəcək və növbəti seçkilərdə arzu etdiyi 30 faizlik sərhəddi aşma şansına sahib olacaq".

N.Cəfərli ikinci mühüm koalisiya varinatına, AKP ilə CHP-nin ittifaqına da toxunub:

"Nə qədər qəribə səslənsə də, belə bir koalisiyanın qurulması həm MHP-yə, həm HDP-yə sərf edir.

1) Hər ikisi ana müxalifət roluna iddialıdır, müxalifətdə qalmanın rahatlığı ilə hökumətin hər addımını tənqid edirlər;

2) AKP ilə koalisiyanı bağışlamayan CHP-nin hədsiz sol və liberal qanadı HDP-yə meyl edəcək;

3) CHP ilə koalisiyanı həzm etməyən cümhuriyyətçi, amma dindar milliyətçi olan AKP seçicisi MHP-yə, dindar kürd seçicisi isə HDP-yə üz tutacaq".