Türkiyənin Cümhuriyyət Xalq Partiyasının sədri Kamal Kılıçdaroğlu Azərbaycana məxsus hərbi helikopterin qəzaya uğraması nəticəsində həlak olanlarla bağlı başsağlığı verib.

Axar.az xəbər verir ki, bu barədə Kamal Kılıçdaroğlu Tvitter hesabında paylaşım edib.

"Təlim zamanı Azərbaycanın hərbi helikopterinin qəzaya uğraması nəticəsində şəhid olan əsgərlərə Allahdan rəhmət, dost və qardaş ölkə olan Azərbaycan xalqına başsağlığı və səbir diləyirəm. Ürəyimiz sizinlədir", - Kılıçdaroğlu vurğulayıb.

Qeyd edək ki, bu gün Dövlət Sərhəd Xidmətinin hərbi helikopteri təlim zamanı Xızı rayonu ərazisindəki Qaraheybət poliqonunda qəzaya uğrayıb. Qəza nəticəsində 14 zabit həlak olub, 2 zabit yaralanıb.