Ukrayna-Rusiya gərginliyi artan xəttlə gedir. Bu gərginliyin hər an müharibəyə dönmə ehtimalı var. Məncə, müharibə olmayacaq.

Axar.az xəbər verir ki, bu barədə iqtisadçı Natiq Cəfərli qeyd edib.

“Sabah Putinlə Bayden arasında danışıqlar baş tutacaq, əsas müzakirə mövzusu Ukrayna olmalıdır. Hansısa ciddi nəticələrin əldə edilməsinə ümid azdır, amma ən azından, müharibə təhlükəsinin azaldılması üçün bu danışıqların mühim rolu olmalıdır. Analiz edək ki, tərəflər nə istəyir? Kreml deyir ki, Ukrayna Qərbə inteqrasiya olmasın. NATO-ya üzv olmamalıdır, çünki NATO infrastrukturu Rusiya sərhədlərində olsa, bu, Moskvanın maraqlarına zidd, hətta “qırmızı cizgilərin” keçilməsi kimi dəyərləndirilə bilər. Rəsmi Moskva bəyan edir ki, məsələn, Xarkov ətrafında NATO raketləri olsa, bu, Moskvaya bir neçə dəyiqəyə çata bilər, çünki məsafə 740 km-dir. İlk baxışdan bu arqument məntiqli olsa da, aldadıcıdır, çünki NATO ölkələri olan Baltikyanı respublikaların sərhəddindən Moskvaya məsafə daha yaxındır. Latviya sərhəddindən Moskvaya cəmi 680 kilometrdir. NATO ölkəsi olan Türkiyədən Qara Dəniz üzərindən Krıma məsafə 300 kilometrdir. Deməli, Rusiyanın, “Ukraynada NATO bazası olsa bizim sərhədlərə təhlükədir”, tezisi doğru deyil”, - iqtisadçı bildirin.

Onun sözlərinə görə, rəsmi Vaşinqton Əfqanıstan fiaskosundan sonra Ukrayna məsələsində güzəşt etmək, geri çəkilmək istəmir:

“Baydenin zatən reytinqində ciddi düşmə var. İndi Ukrayna məsələsində də geri addım atsa və ya Rusiyanın Donbası ilhaqına göz yumsa, respublikaçılar onu “yeyəcək”, növbəti Senat və Konqres seçkilərində demokratlar ciddi yer itirəcək. Bu, məsələnin görünən tərəfidir. Daha dərin məsələ odur ki, Rusiyanın ətrafında geniş bir halqa yaradılır. 3 dəniz konsepsiyası – Baltik, Qara dəniz və Xəzər xətti, ardınca isə Orta Asiya xətti (həm də Türk Dünyası) dairəsi ilə Rusiya dairənin içinə alınır. Bu, daha uzunmüddətli konsepsiyadır”.

N.Cəfərli bildirib ki, rəsmi Kiyev çıxılmaz vəziyyətdədir. Krım əldən gedib, qayıtması mümkünsüzdür:

“Donbası mental olaraq itiriblər, sadəcə bununla barışmaq çətindir. İqtisadi çətinliklər, oliqarxik daxili çəkişmələr - bütün bunlar Ukraynanın qarşısında olan əsas çağırışlardır. Həll yolları isə Qərbə inteqrasiyanın sıxlığından keçir, başqa yol yoxdur. Çünki Rusiya özü bütün körpüləri yandırıb, Ukraynaya qarşı düşmənçiliyini hər addımda göstərir”.

Politoloq hesab edir ki, Donbasın qondarma, Kreml tərəfindən yaradılan “respublikalarını” Rusiya tanıyacaq:

“Abxaziya, C.Osetiya ssenarisinə gedəcək. Onsuz da Donbasda Rusiya pasportu paylanır. Artıq 350 min insana Rusiya pasportu paylanılıb. Gələn ilə bu rəqəm 1 milyon nəfərə çatacaq. Sonra Rusiya qondarma, “cırtdan ölkələrin” Moskvaya bağlı “liqasını” yaradacaq”.