Bu gün PKK-nın Türkiyədəki aktivliyi birbaşa Rusiya ilə bağlıdır.

Bunu Axar.az-a açıqlamasında NATO Əməkdaşlıq İnstitutunun rəhbəri Fərrux Məmmədov söyləyib. Onun sözlərinə görə, Rusiya Suriyanı itirməklə barışmaq istəmir:

"Rusiyanın bölgədə təhdidi gündən-günə artmaqdadır. Çünki bu gün PKK-nın Türkiyədəki aktivliyi birbaşa Rusiya ilə bağlıdır. Eyni zamanda, Rusiyanın Ermənistanda təşkil etdiyi hərbi təlimlərin heç biri təsadüfi deyil. Təlimlərin başladığı vaxtla bərabər PKK-nın Türkiyənin şərqində aktivliyini artırması birbaşa Ərdoğan siyasətinə mesajdır. Çünki Rusiya Yaxın Şərqdə son qalası olan Suriyadan demək olar ki, çıxmaq üzrədir və ölkənin siyasi rəhbərliyi bu məğlubiyyəti qəbul edə bilmir. Ona görə də Türkiyəni daxili xaosa sürükləyərək, Suriya məsələsini ikinci plana atmaq məqsədi güdürlər. Bugünkü aktivlik birbaşa Türkiyəyə hesablanıb. Əsas məqsəd isə Türkiyənin xarici siyasətinə əngəl törətməkdir. Rusiyanın Gümrüdəki bazası bu gün iki xətt üzrə fəaliyyət göstərir: Birinci xətt bayaq söylədiyim Türkiyə məsələsidir. Digər xətt isə Cənubi Qafqazda Qarabağa təsir edərək, Azərbaycandakı mövcudiyyətini artırmaq və Bakını nəzarət altında saxlamaq. Bugünkü təlimlər buna hesablanıb".