Əgər Putin və Zelenski gərginliyin azalması üçün vasitəçi axtarırlarsa, görüş üçün ən optimal məkan Türkiyədir. Yaxşı təşəbbüsdür. Qərb paytaxtlarından fərqli olaraq, Ankaranın həm Moskva, həm də Kiyevlə tərəfdaşlıq münasibətləri var.

Axar.az xəbər verir ki, bu sözləri politoloq Elxan Şahinoğlu Türkiyə Prezidenti Rəcəb Tayyip Ərdoğanın həmkarları Vladimir Putin və Vladimir Zelenskini Türkiyəyə dəvət etməsi barədə danışarkən deyib.

“Rusiya–Ukrayna müharibəsinin Türkiyə üçün də geosiyasi və geoiqtisadi mənada mənfi nəticələri olacaq. Putin və Zelenski Ankarada görüşə bilərlər. Ancaq bu, mövcud məsələlərin həlli üçün yetərli deyil. Problem ondadır ki, Rusiya Krımdan və Donbas separatçılarına dəstəkdən, Kiyev isə öz ərazilərini geri qaytarmaq təşəbbüslərindən əl çəkən deyil. Türkiyənin vasitəçiliyi sadəcə Rusiya-Ukrayna müharibəsini bir müddət gecikdirə bilər. Ancaq bunun özü də kiçik nəticə kimi qiymətləndirilə bilər”, - politoloq bildirib.