NATO və ABŞ zamanında müdaxilə etməzsə, Rusiyanı Polşa və Rumıniya sərhədlərində görə biləcəyik.

Bu sözləri Axar.az-a açıqlamasında hərbi mütəxəssis Ədalət Verdiyev Rusiya-Ukrayna müharibəsi barədə danışarkən deyib.

“Rus ordusu üç istiqamətdən hücum edərək, Ukraynanın dərinliyinə doğru irəliləməyə çalışır. Bir çox hərbi hava limanına və aerodroma zərbələr endirir. Yalnız bir istiqamətdə mülki vətəndaş itkisi 10-a qədərdir. NATO və ABŞ-ın reaksiyasının bu qədər ləng olması kifayət qədər şübhəlidir. Görünür ki, NATO güclü rəqib olan Rusiya ilə savaşmaq istəmir. Əgər indi vəziyyətə müdaxilə olunmasa, Rusiya yenidən İkinci Dünya müharibəsinin başladığı Şərqi Avropa sərhədlərinə qədər irəliləyə və digər NATO üzvü olan Avropa ölkələrinə qarşı da təhdidlər törədə bilər. Ukrayna tərəfi kifayət qədər ciddi müqavimət göstərsə də, Rusiya çox güclüdür. Buna görə də Ukraynanın təkbaşına Rusiya hücumunu dayandırması gözlənilən deyil”, - o qeyd edib.