Sentyabrın 11-də Astanada Türkdilli Dövlətlərin Əməkdaşlıq Şurasının (TDƏŞ) V Sammitində Günay Əfəndiyeva Türk Mədəniyyəti və İrsi Fondunun prezidenti təyin edilib. Bu barədə sənədi Sammitdə iştirak edən nümayəndə heyətlərinin rəhbərləri imzalayıblar.

Axar.az AzərTac-a istinadla xəbər verir ki, sentyabrın 10-da isə Günay Əfəndiyevanın təyinatı məsələsi TDƏŞ-ə üzv dövlətlərin xarici işlər nazirlərinin görüşündə müzakirə olunub. Günay Əfəndiyeva görüşdə çıxış edərək deyib ki, Türk Mədəniyyəti və İrsi Fondunun yaradılması türk dünyası üçün böyük bir töhfə olacaq. Bu Fondun məqsədi türkdilli ölkələrin mədəniyyətini, irsini araşdırmaq, qorumaq, təbliğ və təşviq etmək, gələcək nəsillərə ötürməkdən ibarətdir.

Fondun gələcək fəaliyyətindən danışan G.Əfəndiyeva deyib: "Fond öz fəaliyyətini digər türkdilli və beynəlxalq təşkilatların təcrübəsindən istifadə etməklə, onlarla əməkdaşlıq yolu ilə həyata keçirəcəkdir. Qədim mədəniyyətimizin ömrü, bizim ona verdiyimiz dəyər qədərdir. Türk xalqlarının sahib olduğu mədəni irsi yenidən ona qazandırmaq bizim ən böyük hədəfimizdir".

Xatırladaq ki, mərkəzi ofisi Bakıda yerləşməklə yaradılan Türk Mədəniyyəti və İrsi Fondunun fəaliyyətinin təmin edilməsi məqsədi Azərbaycan Prezidenti İlham Əliyev 7 may 2015-ci il tarixli sərəncam vermişdi. Sərəncamda Günay Elçin qızı Əfəndiyevanın Fond rəhbərliyinə təyin olunması ilə bağlı təklifin Türkdilli Dövlətlərin Əməkdaşlıq Şurasının Dövlət Başçıları Şurasına təqdim edilməsi Xarici İşlər Nazirliyinə tapşırılmışdı.