Həbs olunan Adil Rəcəbov müavinim olmayıb.

Bunu Axar.az-a Əbu Bəkr məscidinin imam-camaatı Hacı Qamət Süleymanov deyib.

Onun sözlərinə görə, vəhhabi əməliyyatında tutulan 42 nəfər arasında olan A.Rəcəbovu radikalizmə qarşı olan bir dindar kimi tanıyıb.

Q.Süleymanov onunla normal münasibəti olduğunu qeyd edib. O, A.Rəcəbovun "İslam dövləti" terror təşkilatının tərəfdarı olmadığını söyləyib.

"Adil müavinim olmayıb, düzgün təqdim etməyiblər. Amma onunla normal ünsiyyətimiz var. Mən Adili radikallığa qarşı olan insan kimi tanımışam, indi bilmirəm ki, onu niyə tutublar. Haradasa radikal çıxışına da rast gəlməmişəm", - deyə Hacı Qamət vurğulayıb.

Sələfi lideri xatırladıb ki, Əbu Bəkr məscidi bağlanana qədər A.Rəcəbov ibadət evinə namaza gəlib. Hacı Qamət ölkədə radikal təriqətçilərin, İŞİD tərəfdarı olan adamların həbsini təqdir edib. O, ümid edir ki, A.Rəcəbov sorğu-sual edilib, sərbəst buraxılacaq.

Xatırladaq ki, bu gün Bakıda radikal dini qruplaşma üzvlərinə qarşı əməliyyat keçirilib. Yasamal Rayon Polis İdarəsindən APA-ya verilən məlumata görə, "Farklı Lahmacun" kafesində həyata keçirilən əməliyyat zamanı 40-a yaxın şəxs saxlanılıb.

Saxlanılanların arasında Hacı Qamətin müavini kimi təqdim edilən A.Rəcəbov da var. Daxili İşlər Nazirliyinin mətbuat xidmətindən bildirilib ki, hadisə ilə bağlı nazirlik rəsmi açıqlama yayacaq.