"Təşkilatçılıq çox yüksək səviyyədə həyata keçirilib. Biz 3 seçki dairəsində və 16 seçki məntəqəsində müşahidə aparmışıq. Getdiyimiz bütün yerlərdə şəffaf və demokratik seçki prosesinin şahidi olmuşuq".

Bu fikirləri Secki-2015.az saytına Qırğızıstan Mərkəzi Seçki Komissiyasının üzvü Carkın Papanova müşahidə təəssüratlarını bölüşərkən deyib.

Xarici müşahidəçinin dediyinə görə, seçki prosesində vətəndaş fəallığı yüksəkdir: "Vətəndaşlar seçkilərə maraq göstərirlər. Mən yerli müşahidəçilərlə söhbət apardım. Onlar bildirdilər ki, heç bir qanun pozuntusu, yaxud şikayətlə rastlaşmayıblar".

Carkın Papanova bildirib ki, onun diqqətini çəkən amillərdən biri də seçki məntəqələrində müasir standartlara cavab verən texnologiyaların quraşdırılmasıdır. O deyib: "Bir sözlə, demək istərdim ki, xalq seçkilərə maraq göstərir və ortada heç bir neqativ hal yoxdur. Ümumiyyətlə, mən seçicilərinizdə yalnız pozitivlik görürəm. Digər ölkələrdən fərqli olaraq, sizin ölkədə böyük siyasi qütbləşmə görünmür. Xalq məmnuniyyətlə seçkilərə qatılır".