Ümid Partiyasının sədri, deputat İqbal Ağazadə "ekzit-pol"un nəticələrinə görə bu dəfə millət vəkili seçilməyib.

Axar.az xəbər verir ki, Fransanın "Opinion Vey" yenilikçi araşdırma şirkəti və Azərbaycan Gənclərinin Hüquqlarını Müdafiə Mərkəzinin Milli Məclisə seçkilərdə keçirdiyi "ekzit-pol"un nəticələri belə deməyə əsas verir. İ.Ağazadənin namizəd olduğu 35 saylı Xətai III Seçki Dairəsindən Azərbaycan Sosial Demokrat Partiyasının (ASDP) sədri Araz Əlizadə deputat seçilib. A.Əlizadənin 46,7 faiz səslə İ.Ağazadə üzərində qələbə qazandığı elan olunub.

Eyni zamanda, "ekzit-pol"un nəticələrində 17 saylı Yasamal III Seçki Dairəsindən bitərəf namizəd, "Kaspian Konsaltinq" şirkətində hüquqşünas çalışan Elşad Həsənovun mandat qazandığı məlum olub. Bu dairə üzrə YAP-ın vahid namizədi paytaxtın Xəzər rayon icra başçısının müavini Lalə Əhmədova idi. L.Əhmədovanın dövlət qulluğunda çalışmaq istəməsi ilə əlaqədar namizədliyini geri götürməsindən sonra tanınmış jurnalist İlhamiyyə Rzayevanın deputat seçilmək şansları yüksək görünürdü. Amma "ekzit-pol" seçicilərin E.Həsənova etimad göstərdiyini açıqlayıb.

Qeyd edək ki, "ekzit-pol" rəsmi nəticələr deyil.