Gürcüstanda heç kim dövlət çevrilişi edə bilməz.

Axar.az xəbər verir ki, bunu jurnalistlərə açıqlamasında Gürcüstanın Energetika naziri Kaxa Kaladze söyləyib. Onun sözlərinə görə, Gürcüstan üçün çevrilişi Mixail Saakaşvili hazırlayıb:

"Artıq xüsusi xidmət orqanları bu istiqamətdə araşdırmaya başlayıblar. Hər şey çox maraqlı olacaq. Gürcüstanda vəziyyət tam nəzarət altındadır".

Qeyd edək ki, bir müddət öncə sosial şəbəkələrdə Mixail Saakaşvilinin "Rustavi-2" telekanalının Baş direktoru Nikoloz Qvaramiya ilə telefon danışığı yayılmışdı. Telefon danışığında eks-prezident Qvaramiyanı hökumətə müqavimət göstərməyə səsləyirdi. Bundan sonra Gürcüstan hüquq mühafizə orqanları dövlət çevrilişinə cəhd adı altında Saakaşviliyə qarşı araşdırmaya başladılar. Lakin Ukrayna mətbuatına müsahibə verən Saakaşvili bütün bunların Rusiya kəşfiyyatı tərəfindən həyata keçirildiyini və keçmiş Baş nazir Bidzina İvanişvilinin bu proseslərin içində olduğunu bildirdi.

Kaxa Kaladze isə son günlər "Qazprom"la Gürcüstana qaz alışını təmin etmək üçün gizli danışıqlara başlayıb. Mətbuat bu hadisələrin arxasında İvanişvilinin dayandığını və Kaladzenin məhz onun göstərişi ilə hərəkət etdiyini bildirir.