NATO-nun sülhməramlı qoşunlarının Qarabağda yerləşdirilməsinin yenidən gündəmə gəlməsinə baxmayaraq, bu məsələ danışıqlar predmeti olaraq qalır və hazırda tərəflər bu istiqamətdə razılığa gəlmirlər.

Bu barədə Axar.az-a açıqlamasında politoloq İlqar Vəlizadə danışıb. Ekspert münaqişə tərəflərinin bu prosesdən uzaq olduğunu bildirib:

"Ümumiyyətlə, bu məsələni NATO-nun sülhməramlı missiyası kimi qiymətləndirmək düzgün olmazdı. NATO-nun bir təşkilat kimi rolu burada konkret işləmir. Qarabağda sülhməramlı qoşunların təşkilini və hansı qüvvəllərdən ibarət olacağı sülh prosesinin gedişatından asılıdır. Yəni sülhlə bağlı prinsipial razılıq əldə olunacağı və bu istiqamətdə konkret addımlar atılacağı təqdirdə sülhməramlı qüvvələr haqqında konkret söhbət aparmaq olar. Ancaq hazırda vəziyyət elədir ki, bu barədə danışıqlar aparılmır və bu, heç mümkün də deyil. Bu barədə yayılan söhbətlər əsasızdır. Keçən il müxtəlif dairələr tərəfindən Rusiyanın sülhməramlı qüvvələrinin regiona yeridilməsindən söhbət gedirdi. Ancaq bu məsələ indiyə qədər reallaşmayıb. Bu məlumatlar kimlərinsə istəyindən irəli gələn fərziyyələrdir və sülhməramlı qoşunların regionda yerləşdirilməsi anlamına gəlməməlidir".

Qeyd edək ki, NATO-nun Cənubi Qafqazla əlaqələr üzrə rəsmi nümayəndəsi Uilyam Laxyu hərbi blokun Qarabağda sülhməramlı qüvvələr yerləşdirmək planlarının olmadığını, ancaq Ermənistan, Azərbaycan və münaqişədə iştirak edən digər tərəflərin istəyi olarsa, bunu müzakirə etməyə hazır olduqlarını bildirib.