Rusiyanın "Vimpelkom" şirkəti Gürcüstanın "Kavkasus onlayn" kompaniyasını almaq istəyir.

Axar.az xəbər verir ki, bunu Gürcüstan mətbuatına müsahibəsində "Kavkasus onlayn" saytının təsisçisi Mamiya Sanadiradze söyləyib. Onun sözlərinə görə, əgər "Kavkasus onlayn" Rusiyanın əlinə keçsə, o zaman Rusiya bölgədəki bütün yazışma və telefon zənglərinə nəzarət etmiş olacaq:

"Söhbət 1200 kilometrlik kabeldən gedir. Bunun vasitəsilə Gürcüstan Avropadan gələn interneti Azərbaycan və Ermənistana verir. Bu, Rusiyanın əlində informasiya axınına nəzarət mexanizmi ola bilər. Həmin kabel 2008-ci ildə Qara dənizin altından çəkilib və onun vasitəsilə Avropadan internet bizə kəsə yolla gəlir. Bunun vasitəsilə "Kavkasus onlayn" şirkəti Ermənistana 85%, Azərbaycana 50%, Gürcüstana 55% internet ötürülüşünü təmin edir. 2007-ci ildə Azərbaycan bu kabeli almaq istəyirdi. Əgər bu kabel "Vimpelkom"un əlinə keçsə, Rusiya bütün zənglərə nəzarət edəcək".

Qeyd edək ki, bundan öncə Tiflis Rusiyanın "Qazprom" şirkəti ilə gizli danışıqlara başlamışdı.