Fövqəladə Hallar naziri Kəmaləddin Heydərov 13 noyabr 2015-ci il tarixində Mingəçevir su anbarında görülən işlərlə yerində tanış olmaq məqsədilə həmin ərazidə olub.

Axar.az FHN-in mətbuat xidmətinə istinadən xəbər verir ki, Fövqəladə Hallar Nazirliyinin Su Ehtiyatları Dövlət Agentliyi və Mingəçevir Şəhər İcra Hakimiyyətinin nümayəndələrinin də iştirak etdiyi səfər zamanı Yaponiyanın "OYO Corporation" və "Shinyei Kaisha" şirkətlərinin mütəxəssisləri ərazidə icrası nəzərdə tutulan hidrotexniki qurğularda texniki təhlükəsizliyin qiymətləndirilməsi üzrə layihə barədə məlumat verib. Bildirilib ki, layihə üzrə hidrotexniki qurğuların vəziyyətinə nəzarət etmək üçün nəzarət-ölçü cihazlarının quraşdırılması, seysmoloji müşahidə şəbəkəsinin qurulması və dalğalanma nəticəsində yaranan vibrasiyasının öyrənilməsi, qurğuların istismar qaydalarının və təhlükəsizlik bəyannamələrinin yenidən işlənib hazırlanması, texniki nəzarət üzrə yerli mütəxəssislər üçün təlimlərin keçirilməsi nəzərdə tutulur.

Nazir Kəmaləddin Heydərov həyata keçirilən və icrası nəzərdə tutulan tədbirlərin əhəmiyyətini qeyd etmiş, işlərin vaxtında və keyfiyyətlə yekunlaşdırılmasının vacibliyini bildirib.