Türkiyənin ev sahibliyi ilə keçirilən G20 zirvə toplantısının ikinci günündə də bir sıra toplantılar baş tutub.

Zirvə törəni üçün möhtəşəm hazırlıqlar həyata keçirmiş "Qaya" otelinin mədəniyyət evində isə G20 liderlərinin xanımlarının iştirakı ilə maraqlı bir törən düzənlənib. Türkiyənin dünyada daha da tanıdılması məqsədilə düzəlnlənmiş mərasimdə Azərbaycanın birinci xanımı Mehriban Əliyeva, Türkiyənin birinci xanımı Əminə Ərdoğan, həmçinin Yeni Zellandiya, Cənubi Afrika, Hindistan, İspaniya və digər ölkələrin liderlərinin xanımları iştirak edib.

Təqribən 2 saata yaxın davam edən törəndən sonra dünyanın dörd bir tərəfindən gəlmiş media mənsublarına foto və videoşəkilişlər üçün izn verilib. Xanımlar bərabər fotolar çəkdirdikdən sonra Yeni Müsavat-ın əməkdaşı Azərbaycan prezidentinin xanımına yaxınlaşıb, zirvə toplantısı ilə bağlı dəyərləndirməsini soruşub.

Mehriban Əliyevə açıqlamasında Türkiyənin G20 zirvəsində fəxri qonaq statusunda Azərbaycana ünvanladığı dəvətindən məmnunluğunu ifadə edib və qardaş ölkəyə minnətdarlığını bildirib: "İlk növbədə təşəkkürümü bildirirəm ki, sayın cümhurbaşqanı bizi zirvə toplantısına dəvət edib. Əlbəttə, Azərbaycanın burda olmağı çox gözəldir və məncə, hər şey çox uğurlu keçir".

Sualı səmimi şəkildə cavablandıran Mehriban xanım sonda "Yeni Müsavat"ın əməkdaşı ilə özçəkim etməyə də etiraz etməyib...

Türkiyə prezidentinin xanımı Əminə Ərdoğan da açıqlamasında G20-nin yüksək səviyyədə davam etdiyini və uğurlu keçdiyini söyləyib. Daha sonra birinci xanımlar səmimi şəkildə görüşüb ayrılıblar. Azərbaycan və Türkiyənin birinci ledilərinin səmimiyyəti və ayrılarkən də bir neçə dəqiqə ikilikdə söhbətləşmələri xüsusi diqqət çəkib. Bütün bunlar isə dünyanın nüfuzlu televiziya və qəzet jurnalistlərinin gözü qarşısında baş verdiyindən həm də dost-düşmənə mesaj kimi anlaşıla bilər.

Qeyd edək ki, G20-nin xanımlarla bağlı toplantısı ilk olaraq Türkiyənin ev sahibliyi ilə baş tutub.