Rusiya təhlükəli oyununu davam etdirir.

Axar.az xəbər verir ki, bu sözləri politoloq Elxan Şahinoğlu Feysbuk səhifəsində qeyd edib.

O bildirib ki, Rusiya Prezidenti Vladimir Putinin Türkiyəyə qarşı elan etdiyi iqtisadi və ticarət sanksiyalar və bundan yaranacaq qarşılıqlı çətinliklər problemin bir tərəfidir:

"Putin və onun əsabələri inadkarcasına Türkiyənin İŞİD terrorçularına dəstək verdiyini, onlara silah və sursat ötürdüyünü, neftini aldığını iddia edir. Bu, ikitərəfli münasibətlərdə daha ciddi problemə çevriləcək. Bu günə qədər Əsəd rejimi xaricində heç bir dövlət, hətta Ankaraya dost münasibəti olmayan ölkələr (Yunanıstan, İsrail) Türkiyənin terrorçulara dəstək verdiyini söyləməmişdi. Rusiyada isə bu ittihamlar dövlət siyasətinin tərkib hissəsinə çevrilib. Demək, Kreml Ankara ilə körpüləri yandırmaq xəttindən hələ uzun müddət geri çəkilməyəcək. Bu arada, Rusiya mediasında "Ermənistana və Dağlıq Qarabağa dəstəyimizi artıraq" fikirlərinin sayı artır. Rusiya mediası isə Kreml texnoloqları tərəfindən idarə olunur".