Sülhməramlı qoşunların Dağlıq Qarabağa dislokasiyası yalnız konfliktin siyasi həllindən sonra mümkündür.

Axar.az xəbər verir ki, bunu Ermənistanın "Tert.am" saytına açıqlamasında NATO Baş katibinin Cənubi Qafqaz və Mərkəzi Asiya üzrə nümayəndəsi Ceyms Appaturay söyləyib. Onun sözlərinə görə, hazırda konfliktin siyasi həlli üçün heç bir zəmin yoxdur.

Appaturay həmçinin Rusiya-Türkiyə münasibətlərinin pisləşməsinin NATO-nun Cənubi Qafqaz ölkələri ilə əməkdaşlığına təsir etməyəcəyini bildirib:

"Biz razıyıq ki, hər üç ölkə öz şəxsi təhlükəsizlik siyasətini seçib. Biz buna hörmət edirik. Bizim bütün partnyorluq münasibətlərimiz Alyansın üzvü olan 28 ölkə, eləcə də Türkiyə tərəfindən dəstəklənir. Cənubi Qafqaz ölkələri ilə münasibətlərimiz heç bir halda Rusiyadan asılı deyil. Ona görə də Rusiya-Türkiyə münasibətlərinin pisləşməsinin NATO-nun Cənubi Qafqaz ölkələri ilə əlaqələrinə birbaşa təsir edəcəyini düşünmürəm".