Ankarada Məmməd Əmin Rəsulzadənin 130 illik yubileyi ilə bağlı tədbirlər keçiriləcək.

Bu barədə "Axar.az"a Azərbaycanın Türkiyədəki səfirliyinin Mətbuat Xidmətinin rəhbəri Elsəvər Salmanov məlumat verib.

O, tədbirdə əsasən Türkiyə-Azərbaycan parlamentlərarası dostluq qrupu üzvlərinin iştirak edəcəyini bildirib. Mətbuat katibi eyni zamanda Türkiyədə təhsil alan tələbələrimizin də burada olacaqlarını qeyd edib.
"Tədbirə Azərbaycandan Mədəniyyət və Turizm nazirinin müavini Vaqif Əliyev, Mübariz Qurbanlı, Qənirə Paşayeva, Məlahət İbrahimqızı, Aqil Abbas, Sabir Rüstəmxanlı, Yaqub Mahmudov və Tamerlan Axundov qatılacaqlar. Türkiyədən kimin tədbirdə iştirak etməsinə hələ qərar verilməyib. Sabah bunlar haqqında dəqiq məlumat veriləcək".

Qeyd edək ki, bu gün - 31 yanvarda Məhəmməd Əmin Rəsulzadənin anadan olmasının ildönümüdür. Azərbaycan Respublikası Prezidenti İlham Əliyevin sərəncamı ilə Xalq Cümhuriyyətinin qurucularından olan böyük öndər Rəsulzadənin 130 illik yubileyi dövlət səviyyəsində keçirilir.