Bayram günləri adətən əyləncəli efir materiallarına üstünlük verilir, bu hal isə yaxşıdır.

Bu sözləri Axar.az-a MTRŞ-nin Ekspertiza, Proqramlaşdırma və Analitik şöbəsinin müdiri Təvəkkül Dadaşov bayram günləri efirdə yayımlanan əyləncə verilişlərindən danışarkən deyib.

O, bayram efirinə iradlarını da bildirib:

"Bayram əhval-ruhiyyəli xarici filmlər, o cümlədən milli filmlər, cizgi filmləri nümayiş etdirilir. Amma çox təəssüf ki, yenə də həmişəki milli filmlərin yayımlandığı müşahidə olunur. Əslində bu, kanalların günahı deyil, ayrı və ciddi bir problemlə bağlıdır.

O da müşahidə olunur ki, imkan daxilində bütün yaşlardan olan tamaşaçı auditoriyası nəzərə alınır. Bayram günləri üçün nəzərdə tutulmayan verilişlərin də əksəriyyətinə bayram əhval-ruhiyyəsi qatılıb. Bayramdan sonra isə bu günlərdə konkret ciddi qanun pozuntularının olub-olmaması yoxlanılacaq.

İnanırıq ki, qanun pozuntuları müşahidə edilməyəcək. Əslində, yayımçıların əziyyətini də dəyərləndirmək gərəkdir. İnsanlar istirahət edərkən, TV işçiləri onlar üçün əziyyət çəkir".