Ukraynanın Baş naziri Arseni Yaçenyuk dekabrın 6-da Azərbaycan və Qazaxıstandan olan həmkarları ilə telefon söhbəti aparıb.

Report Ukrayna mətbuatına istinadən xəbər verir ki, bu barədə sözügedən ölkənin Nazirlər Kabinetinin mətbuat xidməti məlumat yayıb.

"Ukrayna və Qazaxıstan hökumətlərinin rəhbərləri mövcud problemin həllinə hazır olduqlarını nümayiş etdiriblər və dərhal səmərəli və əlverişli tranzitin təmin edilməsi üçün milli səlahiyyətli idarələrə danışıqları operativ şəkildə başa çatdırmaq tapşırığı veriblər", - deyə məlumatda bildirilir.

Yaçenyuk Azərbaycanın baş naziri Artur Rasizadə ilə də tranzit probleminin həlli yolları ilə bağlı prinsipial razılaşma əldə edib. Tərəflər razılığa gəliblər ki, hər iki dövlətin milli səlahiyyətli nümayəndələri qısa müddət ərzində lazımi texniki qərarların razılaşdırılması üçün bir araya gələcəklər.

Xatırladaq ki, Rusiya Ukrayna mallarının öz ərazisindən tranzitini tam olaraq dayandırıb.