Yağan yağışlar nəticəsində çay daşıb, Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 27-ci km-də, Qudyalçay üzərində yerləşən respublika əhəmiyyətli körpü uçub.

Bu körpünün “1974-cü ildə tikildiyi” haqda tez-tələsik məlumat verilməsinin məqsədi aydındır. Halbuki 2016-cı ildə məhz bu körpünün əsaslı şəkildə “bərpa edildiyi” bildirilmişdi. Yəni körpü kosmetik təmir edilməyib, rəsmi məlumatda “bərpa edildiyi” bildirilir. Əgər bərpa edilibsə, möhkəmləndirilmə işləri aparılıbsa, körpü çay daşması nəticəsində niyə uçmalıdır?

Körpünün yatağı yuyulmayıb, məhz daşıyıcı sütunları çöküb. Araşdırılmalı və bunun mühəndis işlərində yol verilən nöqsan olub-olmaması üzə çıxarılmalıdır.

Zatən, Xaçmazın 43 yaşlı icra başçısı Elnur Rzayev də buna uyğun açıqlama verə bilərdi, yox, verməli idi.

Ancaq gülür, sevinir, fərəhlənir və “gördüyünüz kimi, hər şey öz yerindədir” deyə, “çao” ilə sağollaşır.

Bu respublika əhəmiyyətli körpünün uçması nəticəsində 97 min sakinin ciddi problemi yaranıb, onların Xaçmaz-Xudat və digər ərazilərlə əlaqəsi kəsilib. Ən azı, bu sakinlərə görə başçı narahat olmalı, qanı qaralmalı, araşdırma aparılacağını deməli, mənəvi baxımdan sakinlərin yanında olduğunu göstərməli idi.

Elnur Rzayev isə sevinir, sanki, körpünün uçması ürəyincədir. Niyə? Ona görə ki, yeni körpü üçün külli miqdarda vəsait ayrılacaq?

Yeri gəlmişkən, bu, həmən icra başçısıdır ki, bir ay öncə özünə 450 min manatlıq bahalı avtomobil alması ilə gündəmə gəlmişdi...