Kreml açıq şəkildə dilə gətirməsə də, Yaxın Şərqlə bağlı nöqtələrdə Rusiya və İran hazırda müttəfiq kimi çıxış etməkdədirlər.

Bu barədə Axar.az-a açıqlamasında analitik Vüqar Zifəroğlu bildirib. O, Səudiyyə-İran qarşıdurmasının bir çox ölkələrin xarici siyasətinə təsirsiz ötüşməyəcəyini deyib:

"Rusiya Yaxın Şərq siyasətində İran ilə müttəfiq olaraq çıxış edir. Bu özünü bir çox məqamlarda, o cümlədən, Suriya məsələsində də göstərir. Səudiyyə-İran qarşıdurması bölgədə aktiv rol oynayan ölkələrə və onların xarici siyasətinə öz təsirini göstərəcək. Ancaq hazırkı gedişat fonunda Moskvanın Suriya siaysətində hər hansı bir dəyişikliyə getməsi inandırıcı deyil. Suriya Rusiyanın Yaxın Şərqdə öz mövcudluğunu qoruya bilməsi üçün artıq prinsipial bir məsələyə çevrilib. Kreml açıq şəkildə dilə gətirməsə də, Yaxın Şərqlə bağlı nöqtələrdə Rusiya və İran hazırda müttəfiq kimi çıxış etməkdədirlər. Bəzi rus politoloqlarının açıqlamaları bunu əyani şəkildə sübut edir. Ona görə də hərbi qarşıdurma olacağı təqdirdə Moskvanın kimin yanında yer alacağını təsəvvür etmək elə də çətin deyil".