Son vaxtlarda müşahidə edilən qiymət artımı yerli məhsullara şamil edilməməlidir. İstehlak qiymətlərinə çox ciddi nəzarət etmək lazımdır.

Axar.az xəbər verir ki, bunu Azərbaycan Prezidenti İlham Əliyev Nazirlər Kabinetinin 2015-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında deyib.

"Manatın məzənnəsinin dəyişməsi ilə bəzi işbazlar süni şəkildə qiymətləri qaldırmaq istəyirlər. Əlbəttə ki, biz ərzaq məhsulları ilə bağlı müəyyən qədər idxaldan asılıyıq. Hələlik, 100 faiz özümüzü təmin edə bilməmişik. Ancaq Azərbaycanda istehsal edilən məhsullarda qiymət artımı mümkün deyil, olmamalıdır. Mənə məlumat gəlir ki, manatın məzənnəsindən natəmiz insanlar, işbazlar istifadə etmək istəyirlər. Buna, süni bahalaşmaya son qoyulmalıdır və çox ciddi cəza tədbirləri görülməlidir. Və sadəcə cərimələrlə kifayətlənməməliyik. Prokurorluq orqanları çox ciddi məşğul olmalı və bu vəziyyətdən öz şəxsi maraqlı üçün istifadə etmək istəyənlərə çox ciddi cəza tədbirləri görülməlidir. Bu, mətbuatda da işıqlandırılmalıdır ki, buna son qoyulsun", - Prezident bildirib.