Tailandda səfərdə olan millət vəkili Qənirə Paşayeva Tailand kral ailəsinin üzvləri, kraliça Sirikitin şəxsi katibləri Zanpuying Farani Mahanonda, Zanpuying Supornfen Laungzer, kraliça Sirikit İnstitunun və Fondunun rəhbərləri ilə görüşüb.

Axar.az xəbər verir ki, millət vəkili görüşdə Azərbaycan tarixi, mədəniyyəti ilə bağlı bütün istiqamətlərdə görülən işlərlə və əldə edilən uğurlarla bağlı geniş məlumat verib.

Görüş zamanı Kraliça Sirikit Phra Baromma Rajini Nath tərəfindən və onun dəstəyi və rəhbərliyi ilə qurulan institut, fond və muzeyin fəaliyyəti, mədəniyyət, təhsil və sosial sahədə həyata keçirilən layihələr, əldə olunan uğurlar barədə söz açılıb.

Millət vəkili Tailand kral ailəsinin üzvlərini, kraliça Sirikitin şəxsi katibləri Zanpuying Farani Mahanonda, Zanpuying Supornfen Laungzer, kraliça Sirikit İnstitunun və Fondunun rəhbərliyini Azərbaycana dəvət edib.

Həmçinin Q.Paşayeva Ermənistanın işğal etdiyi Azərbaycan torpaqlarında törətdiyi vandalizm aktlarından, öz evinə dönə bilməyən 1 milyon azərbaycanlı qaçqın və məcburi köçkünlərdən və Xocalı soyqırımından danışıb:

"Dünyanın harasında yaşamasından asılı olmayaraq dünyada beynəlxalq hüquq və ədalətin yanında olan ölkə və xalqlar Ermənistanın işğalçılıq siyasətinə öz etiraz səslərini daha da yüksəltməli və azərbaycanlı qaçqın və məcburi köçkünlərin öz ev-eşiklərinə dönməsi üçün səylərini artırmalıdırlar".

Sonda Q.Paşayeva onlara rəhbərlik etdiyi Avrasiya Beynəlxalq Araşdırmalar İnstitutu İB-nın hazırladığı və içərisində Qarabağ həqiqətlərini əks etdirən ingilis dilində sənədli filmlərin olduğu "Azərbaycan həqiqətləri" filmləri kataloqunu, Azərbaycanla bağlı müxtəlif materialları hədiyyə edib.