Azərbaycanın Ermənistan tərəfindən işğal olunmuş ərazilərindəki qondarma rejimin fermer və əkinçilərinin İrana səfəri həqiqəti əks etdirmir.

Bunu Axar.az-a açıqlamasında Xarici İşlər Nazirliyinin mətbuat xidmətinin rəhbəri Hikmət Hacıyev söyləyib. Onun sözlərinə görə, XİN diplomatik kanallar vasitəsilə bu məlumatı araşdırıb:

"İran İslam Respublikasının Azərbaycan Respublikasındakı səfirliyindən Xarici İşlər Nazirliyinə ünvanlanmış cavab notasında qondarma rejimin fermer və əkinçilərindən ibarət nümayəndə heyətinin İrana səfəri və bu ölkənin rəsmiləri ilə görüşməsi barədə xəbərin həqiqəti əks etdirmədiyi bildirilib. Ermənistan KİV-də yayılan xəbərlər təkzib olunub".

Qeyd edək ki, bir müddət öncə Ermənistan KİV-də Dağlıq Qarabağ ərazisindəki qondarma rejimin fermer və əkinçilərindən ibarət nümayəndə heyətinin 2015-ci ilin oktyabr ayında İran İslam Respublikasına səfəri etdiyi və İran rəsmiləri ilə görüşməsi barədə məlumat yayılıb.