Bu gün öz işinə başlayan III Bakı Beynəlxalq Humanitar Forumunun açılış mərasiminə Azərbaycan Prezidenti İlham Əliyev və xanımı Mehriban Əliyeva da qatılıblar ("Trend.az")

Yüzdən çox ölkəni təmsil edən qonaqların iştirak etdiyi, iki gün davam edəcək Forumda Azərbaycan prezidenti İlham Əliyev çıxış edib. Prezident çıxışında Dağlıq Qarabağ münaqişəsinə və Azərbaycanın humanitar fəlakətlə üzləşməsinə toxunub ("APA") və bildirib ki, ATƏT iki dəfə əraziyə faktaraşdırıcı missiya göndərib, onların sənədlərində Azərbaycanın mədəni, milli abidələrinin dağıdıldığı əksini tapıb: "Əfsuslar olsun ki, beynəlxalq təşkilatların qərarları icra edilmir. Bu, dözülməz faktdır. Bəzi hallarda beynəlxalq təşkilatlar tərəfindən qəbul edilən qətnamələr saatlar içində icra olunur, bizə gələndə, 20 ildən artıqdır, uzanır. Bir milyondan çox qaçqın və məcburi köçkün öz doğma yurduna, doğma torpağına qayıtmalıdır. Bu, çox böyük humanitar fəlakət ölkəmizin ümumi inkişafına ciddi zərbə vurur".