Türkiyə ilə yaşanan hazırkı gərginlik və ikinci dəfə sərhədlərin pozulması fonunda aparılan müharibə təbliğatı Rusiya üçün çox vacib bir piardır.

Bu barədə Şərq-Qərb Araşdırmalar Mərkəzinin rəhbəri Ərəstun Oruclu Axar.az-a açıqlamasında bildirib.

Politoloq Rusiya-Türkiyə müharibəsinin başlaması ilə bağlı səsləndirilən fikirlərin qeyri-ciddi olduğunu deyib:

"Hazırda iki ölkə arasında davam edən bu proses Rusiya üçün çox vacib bir piardır. Xüsusilə də Ukrayna və Suriya uğursuzluğunu arxa plana keçirmək, ölkədəki sosial-iqtisadi durumu diqqətdən kənar saxlamaq üçün daha çox xarici təhlükə amilini qabartmağa ehtiyac var. Müharibə ehtimalından yalnız təbliğat vasitəsi kimi istifadə olunur. Hesab etmirəm ki, iki ölkə arasındakı vəziyyət bundan o tərəfə keçə bilsin. Təbii ki, burada bəzi diqqət çəkən məqamlar var - məsələn, Rusiyanın bir müddət öncə Su-35S təyyarələrini Suriyaya göndərməsi kimi. Ancaq bundan əvvəl Rusiya Suriyaya daha təhlükəli, Tu-160 ağır bombardmançı və silah daşıyan təyyarələri göndərmişdi. Bütün bunların o demək deyil ki, iki ölkə arasında müharibə ola bilər. Zənnimcə, yaxın zamanlarda bu böhran çözüləcək".

Qeyd edək ki, Rusiyanın Su-34 bombarmançısı yanvarın 29-da Türkiyənin hava məkanını pozub.