Millət vəkili Qənir Paşayeva "Dünya Turizm Forumu"nda Qarabağla bağlı çağırış edib.

Axar.az xəbər verir ki, yüzlərlə tanınmış şirkət rəhbəri, siyasətçi, məşhur media qurumu və turizm şirkətinin iştirakı ilə keçirilən "Dünya Turizm Forumu"nda millət vəkili "Siyasət və turizm" mövzusunda geniş məruzə ilə çıxış edib.

Q.Paşayeva turizmin genişlənməsinin iqtisadiyyatla bərabər mədəniyyətlər və dinlərarası dialoqa da öz müsbət töhvələrini verdiyini deyib.

Deputat dünyada turizmin genişlənməsinə zərbə vuran amillərdən danışıb:

"Ancaq Azərbaycanın 20 faizinin Ermənistan tərəfindən işğalı ölkəmizə çox böyük zərbələr vurdu. Hazırda işğal altında olan torpaqlarınımız turizm baxımından çox gözəl bölgələrdir. Turizmə zərbə vuran digər ciddi bir amil olan terrorun bütün dünyada artması böyük narahatlıq doğurmalıdır. Ona görə də harada baş verməsindən asılı olmayaraq, işğallara qarşı hər kəs öz etiraz səsi ucaltmalıdır. Ermənistanın dəstəyi ilə mülki azərbaycanlılara qarşı terror hadisələri törədiləndə və Türkiyədə terror təşkilatı minlərlə günahsız insanı qətlə yetiriləndə terrorla mübarizədə ciddi dəstək görmədik. Bu məsələdə ikili standartlar olmamalıdır".

Millət vəkili turizm şirkətlərinə xəbərdarlıq edib:

"Bəzi turizm şirkətləri təşkil etdikləri sərgilərdə bilərəkdən və ya bilməyərəkdən Azərbaycanın işğal altındakı Dağlıq Qarabağ bölgəsinin ayrıca bir ölkə kimi təmsil olunması kimi böyük bir səhvə yol verirlər. Dünyada "Dağlıq Qarabağ Respublikası" deyilən bir dövlət yoxdur və olmayacaq".