18:41

Fevralın 12-də SOCAR-ın prezidenti Rövnəq Abdullayev "Günəşli" yatağındakı 10 nömrəli dərin dəniz özülündə (DDÖ) olub.

Axar.az SOCAR-ın saytına istinadən xəbər verir ki, əvvəlcə özülün yanğın söndürüldükdən sonrakı vəziyyətinə baxış keçirilib.

Əsas istehsal qurğu və avadanlıqların, həmçinin quyuların vəziyyəti haqqında şirkətin prezidentinə ayrı-ayrılıqda məruzə edilib.

Sonra SOCAR-ın aidiyyəti rəhbər işçilərinin iştirakı ilə istehsalat müşavirəsi keçirilib.

SOCAR-ın prezidenti yanğının söndürülməsindən sonra özüldə qəzanın nəticələrinin aradan qaldırılması qrafiki ilə tanış olub. Bu istiqamətdə aparılacaq təmir-bərpa işlərinin əsas prioritetlərini vurğulayıb.

Təhlükəsizlik qaydalarına əməl olunmasının, ekoloji məsələlərə diqqət yetirilməsinin, təmir-bərpa işlərinin yüksək keyfiyyətlə aparılmasının və quraşdırılacaq avadanlıqların etibarlılığının mühüm əhəmiyyət daşıdığını söyləyib.

R.Abdullayev özüldə hasilat prosesinin planlaşdırılan müddətdə bərpa olunması məqsədilə görüləcək işlərdən danışıb, idarə və müəssisə rəhbərlərinə konkret tapşırıqlarını verib.