90-cı illərin əvvəlində Milli Orduda dini şöbə olub. Həmin şöbəyə Hacı Nizam adlı din xadimi rəhbərlik edib. O vaxt Müdafiə Nazirliyinin xahişi ilə Qafqaz Müsəlmanları İdarəsindən Hacı nazim ora göndərilmişdi.

Bu sözləri hərbi ekspert Üzeyir Cəfərov Müdafiə Nazirliyinin rəsmisi tərəfindən orduda namaza qadağa qoyulması ilə bağlı açıqlamaya münasibət bildirərkən "Axar.az"a dedi. Onun sözlərinə görə, Hacı Nizam hərbi hissələrdə islam dininin təbliği və digər dinlərə ibadət edən insanlara müxtəlif köməkliklər göstərmək üçün komandirlərlə mütəmadı görüşürdü: "Sonradan Müdafiə Nazirliyində həmin şöbəni ixtisara saldılar".

Xatırladaq ki, müxtəlif təriqətlərə xidmət edən şəxslərin Suriyaya döyüşə yollanması Azərbaycan Ordusunda xidmət edən əsgərlər arasında islam dini ilə bağlı maarifləndirici işlərin görülməsi məsələsini gündəmə gətirib. Ekspertlərin rəyinə görə, radikal dini cərəyanların təbliğat mexanizminin Orduya sızmaması üçün indidən tədbirlər alınması daha məqsədəuyğundur.