Prezident İlham Əliyev İrana səfərinin iki ölkə arasındakı əlaqələrə müsbət təsir edəcəyini açıqlayıb.

Axar.az xəbər verir ki, İRNA agentliyinə açıqlama verən prezident iranlı həmkarı Həsən Ruhani ilə qısa müddət ərzində 4 dəfə görüşdüyünü və bu səfərlərdə siyasi, iqtisadi, mədəni sahələrdə müxtəlif sazişlər imzalandığını diqqətə çatdırıb.

İlham Əliyev Tehran səfərində müxtəlif regional və beynəlxalq məsələlərlə yanaşı, iki ölkə arasındakı siyasi, iqtisadi, mədəni məsələlərin müzakirə ediləcəyini və müxtəlif sazişlər imzalanacağını bildirib:

"İki ölkə arasındakı əlaqələr Azərbaycanın müstəqilliyindən sonra bütün sahələrdə artan xəttlə davam edib. Lakin ticarət həcmi çox aşağıdır və bu mövzuda lazımi tədbirlər görülməlidir. Azərbaycanda investisiya, özəlləşdirmə, daxili və xarici investorlar üçün böyük planlar həyata keçirilir və bu islahatlar sayəsində iranlı investorlar üçün yeni imkanlar yaradılır".

İlham Əliyev qlobal terrorizmlə mübarizə sahəsində dünya ölkələrinin əməkdaşlığının vacib olduğunu vurğulayıb:

"Terrorizm indiki vaxtda dünya ölkələri arasında münasibətləri, regional təhlükəsizliyi təhdid etməkdədir. Terrorizmin inkişafı bütün dünya ölkələri, o cümlədən, bizim bölgəmiz üçün ciddi bir təhdiddir. Afrika, keçmiş Sovetlər Birliyi coğrafiyası, Yaxın Şərqdə terrorizm üzündən milyonlarla adam evini tərk etmək məcburiyyətində qalıb və insani faciə günümüzün bir gerçəyi halında özünü göstərməkdədir".