Azərbaycanın Argentinadakı səfirliyində Xocalı soyqırımının 24-cü ildönümü qeyd olunub.

Axar.az xəbər verir ki, tədbir səfirlik və Argentinanın La Plata universitetinin Beynəlxalq Əlaqələr İnstitutunda fəaliyyət göstərən Azərbaycanşünaslıq kafedrası tərəfindən təşkil olunub.

Səfirliyin müvəqqəti işlər vəkili Rəşad Aslanov Xocalıda ermənilər tərəfindən xüsusi amansızlıqla törədilmiş soyqırımdan, onun beynəlxalq aləmdə tanıdılması istiqamətində Azərbaycan tərəfindən görülmüş işlərdən danışıb.

O, həmçinin Heydər Əliyev Fondunun vitse-prezidenti Leyla xanım Əliyevanın təşəbbüsü ilə başladılan "Xocalıya ədalət!" kampaniyası barədə məlumat verib.

R.Aslanov güclü erməni diasporu olan Argentinada da Xocalı, ümumilikdə Ermənistan-Azərbaycan münaqişəsi ilə bağlı həqiqətlərin yayılmasının zəruriliyini qeyd edib.

Azərbaycanşünaslıq kafedrasının əlaqələndirici professoru Paulo Botta bu soyqırımın danılmasının qeyri-mümkünlüyünü, Argentinada həmin hadisələrlə bağlı məlumatlılığın artırılmasının vacibliyini bildirib.