2016-04-04 22:57:00

Qarabağ bir gün yenə Azərbaycanın olacaq.

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan Türk Qızıl Aypara Cəmiyyətində çıxışı zamanı deyib.

"Türkiyə-Azərbaycan Yüksək Səviyyəli Strateji Əməkdaşlıq Toplantısından sonra keçirdiyimiz mətbuat konfransında cənab Əliyevlə qardaşcasına bir-birimizi qucaqlamağımız əslində dünyaya önəmli bir mesaj idi. Onunla ABŞ-da Nüvə Təhlükəsizliyi Konfransında da görüşümüz oldu. Orada ikən Ermənistan-Azərbaycan hadisələri başladı. Ona başsağlığı verdik. Bu hücumda şəhid olan Azərbaycan əsgərlərinə Allahdan rəhmət, dostum Əliyevə və azərbaycanlı bacı-qardaşlarımıza başsağlığı diləyirəm. Çünki bu gün orada hələ də gərgin döyüşlər davam edir. Türkiyə Qarabağ məsələsində Azərbaycanın yanındadır və yanında olmağa davam edəcək. Qarabağın işğalı və soyqırımların acısı türk milləti olaraq bizim də ürəyimizi yandırır", - Ərdoğan vurğulayıb.

O, Azərbaycana olan dəstəyini 1992-ci ildə Qarabağın işğal edildiyi dövrdə Abdürrahim Karakoçun yazdığı şeirlə ifadə edib.