Ermənistan prezidenti Serj Sərkisyanın aprelin 11-də Müdafiə Nazirliyində bütün günü toplantı keçirməsi və bunun ardınca, aprelin 12-də yenidən Milli Təhlükəsizlik Şurasının iclasını çağırması sırf ölkədəki vəziyyətlə bağlıdır.

Bu sözləri Axar.az-a açıqlamasında Şərq-Qərb Araşdırmalar Mərkəzinin rəhbəri Ərəstun Oruclu deyib. Politoloq hazırda Ermənistanda siyasi vəziyyətin olduqca çətin olduğuna diqqət çəkib:

"Qarabağdakı son hərbi qarşıdurma Ermənistanın daxili siyasi durumunu alt-üst edib. Bundan başqa, məlum hadisələrdən sonra Ermənistan nəinki beynəlxalq aləm tərəfindən, hətta MDB dövlətləri tərəfindən də dəstəklənməyib. Əlbəttə ki, belə bir vəziyyətdə olması Ermənistanı intensiv məsləhətləşmələr və toplantılar keçirməyə vadar edir. Əgər İrəvanın hansısa məqsədləri varsa, bu görünəcək. Hər halda son olaylardan sonra Sərkisyanın plan qurması istisna deyil".

Qeyd edək ki, Ermənistan prezidenti Serj Sərkisyan aprelin 11-də Müdafiə Nazirliyində uzun müddət davam edən toplantı keçirib. Bunun ardınca isə Milli Təhlükəsizlik Şurasının növbəti iclasını çağırıb.

O, sonuncu dəfə aprelin 2-də cəbhə xəttində yaranmış vəziyyətlə bağlı Təhlükəsizlik Şurasının iclasını çağırmışdı.