Korrupsiya Ermənistanın milli təhlükəsizliyinə Azərbaycandan daha böyük təhlükə kəsb edir.

Axar.az xəbər verir ki, bunu Ermənistan mətbuatına açıqlamasında erməni politoloq Riçard Kirakosyan söyləyib. Hakimiyyəti korrupsiyada ittiham edən politoloq ciddi islahatlara, real işə ehtiyac olduğunu söyləyib.

Qarabağdakı son qarşıdurmaya toxunan ekspert burada əsas günahkarın Rusiya olduğunu bildirib:

"Aydındır ki, bu gün Ermənistan üçün ən böyük təhlükə Rusiyanın satqınlığıdır. Lavrov planı adlanan sülh proqramı vasitəsilə Ermənistana təzyiq göstərib bir və ya iki ərazidən geri çəkilməsi istənilir. Bundan sonra Rusiyanın vasitəçiliyi ilə sülh prosesi tətbiq ediləcək. Bu, çox təhlükəlidir".

Kirakosyanın fikrincə, Rusiyanın Qarabağ konfliktində əsas məqsədi bölgəyə öz sülhməramlılarını yerləşdirməkdir. O, bunu həm İrəvan, həm də Bakı üçün təhdid adlandırıb. ABŞ-ın bölgədə passivliyinə deyinən Kirakosyan Qarabağ konfliktinə nəzarətin Rusiyaya verilməməsi gərəkdiyini bildirib.

Politoloq həmçinin hazırkı hakimiyyətə Moskvadan güclü təzyiqlər göstərildiyini də vurğulayıb. O, bunun əsas sübutu kimi Sərkisyanın eks-prezidenti Levon Ter-Petrosyanla görüşə getməsini göstərib:

"Ümid edirəm ki, Sərkisyan 2013-cü ildə buraxdığı səhvi təkrarlayıb, Rusiyaya asan təslim olmayacaq. İndi situasiya daha qəlizdir. Bu milli təhlükəsizlik və milli maraq məsələsidir və biz ümid edək ki, Ermənistan prezidenti öz şəxsi maraqlarını dövlət maraqlarından üstün tutmayacaq".