Bir neçə gün öncə Qəbələdə Nohurgöldən meyiti çıxarılan İlham Qəribovun ölümü ilə bağlı bəzi təfərrüat məlum olub.

Axar.az Qlobal.net-ə istinadən xəbər verir ki, İ.Qəribovun ölümü intihar deyil, qəsdən törədilmiş cinayətdir.

Məlumata görə, İ.Qəribovun biznesi olub və evdən çıxarkən üstündə külli miqdarda pul varmış.

Mərhumun gölün sahilində aşkar edilən çantasında onun mobil telefonu, pasportu və digər əşyaları olsa da, üzərində və çantasında pul tapılmayıb.

Mərhumun ailəsi və yaxınları İlhamın intihar etdiyinə inanmır. Onun çox şən, nəşəli, ailəsinə bağlı biri kimi xarakterizə edir. O, ailəsinə Qəbələyə gedəcəyi ilə bağlı heç bir məlumat verməyib.

Qeyd edək ki, 40 yaşlı İlham İslam oğlu Qəribov yanvarın 16-da yaşadığı Bakının Binəqədi rayonu, Əcəmi Naxçıvani küçəsindəki evdən çıxaraq, bir daha geri qayıtmayıb. O gündən onun axtarışları başlayıb.

Axtarışlar zamanı onun meyiti Qəbələdə yerləşən məşhur Nohurgöldə tapılıb.

İ.Qəribov alim İslam Qəriblinin oğludur. İslam Qəribli filologiya elmləri doktorudur, AMEA-nın ədəbiyyat institutunun aparıcı elmi işçisidir.