Azərbaycan Xarici İşlər Nazirliyi həqiqətən də Rusiyanın Azərbaycandakı nümayəndəliyi olan “Rus Evi”nin hüquqi şəxs kimi qeydiyyatdan keçmədiyi üçün fəaliyyətini dayandırmağını istəyib.

Axar.az xəbər verir ki, bunu “Rossotrudniçestvo”nun rəhbəri Yevgeni Primakov bəyan edib.

Primakov “Rossiya 24” telekanalının efirində bildirib ki, Rusiya Xarici İşlər Nazirliyi Bakıdakı “Rus Evi” ilə bağlı yaranmış vəziyyəti həll etməyə çalışır.

Onun sözlərinə görə, Bakıda yerləşən “Rus Evi” 1,5 ay ərzində icarəyə götürdüyü binanı tərk etməlidir, çünki mülkiyyətçi binanı təcili satmaq istəyir, danışıqlar aparılan başqa bir binanın sahibi hələlik “fasilə verib”.

Qeyd edək ki, Azərbaycan tərəfi “Rossotrudniçestvo” agentliyinin Azərbaycan Respublikası ərazisində fəaliyyətinə xitam verilməsi barədə diplomatik kanallar vasitəsilə Rusiya tərəfinə rəsmi bildiriş göndərib.