Bakı və İrəvan münaqişəni institusional şəkildə başa çatdırmalı və həmin gün Minsk Qrupu buraxılmalıdır.

Axar.az xəbər verir ki, bunu Ermənistanın xarici işlər naziri Ararat Mirzoyan Antalya Diplimatik Forumu çərçivəsində azərbaycanlı həmkarı Ceyhun Bayramovla birlikdə keçirilən panel müzakirəsində deyib.

“Biz bir neçə dəfə Minsk Qrupunun buraxılması prosesinə başlamağa və onu başa çatdırmağa hazır olduğumuzu ifadə etmişik. Münaqişə olmayanda bu strukturu buraxmaq mümkündür. Hazırda münaqişə varmı? Ərazidə yoxdur, lakin sənəd üzərində də razılaşma yoxdur. Bizim üçün qərar aydındır. Biz sazişi imzalamalı, həmin gün münaqişəyə institusional olaraq son qoymalı və Minsk Qrupunu buraxmalıyıq. Hansı sənədin daha əvvəl imzalanmasının fərqi yoxdur”, - deyə Mirzoyan vurğulayıb.

Qeyd edək ki, panel iclasında çıxış edən Ceyhun Bayramov sülh sazişi üçün Minsk Qrupunun buraxılması və Ermənistan Konstitusiyasından Azərbaycana torpaq iddialarının çıxarılması şərtini təkrarlamışdı.