Ana səhifə Hadisə |
Bu gün səhər saatlarında Bakı-Sumqayıt yolunda 5 tələbənin ölümünə, 21-nin yaralanmasına səbəb olan "Ford"un sürücüsü Namiq Hüseynov ATV-yə açıqlama verib.
Axar.az xəbər verir ki, qəzanın baş vermə səbəblərindən danışan sürücü arxadan gələn avtomobilin onu sıxışdırdığını, elə bu səbəbdən də idarəetməni itirdiyini bildirib.
“Arxadan gələn ağ maşın məni sıxışdırdı. Mən nə qədər etdim, sağa çəkə bilmədim avtomobili”.
Avtosfer.az-ın yaydığı qəza anının videosunda isə qırmızı rəngli 10 BE 132 dövlət nömrə nişanlı “Ford” mikroavtobusunun arxasınca hər hansı maşının gəldiyi görünmür. Ümumiyyətlə, yolda hər hansı sıxlıq və gərginlik də müşahidə olunmur. Belə aydın olur ki, sürücünün gözünə “ruh” ağ maşın cildində görünüb və yaxud başı digər “Ford”la yarışmaya qatışdığından, ümumiyyətlə, yolu görməyib.
Qeyd edək ki, qəza nəticəsində Sumqayıt Dövlət Universitetinin Fizika və Elektroenergetika fakültəsinin 3-cü kurs tələbələri Quliyev İbrahim Vuqar oğlu, Nəsibov İbrahim Xəqani oğlu, 1999-cu il təvəllüdlü Canıyev Rəşad Füzüli oğlu, 1997-ci il təvəllüdlü Muradova Roza Eynulla qızı və 1996-cı il təvəllüdlü Quliyeva Çinarə Azər qızı dünyasını dəyişib. Hadisəyə səbəb olan sürücü saxlanılıb.
Tarix
2017.03.09 / 21:59
|
Müəllif
Axar.az
|