“Allah” sözü fərqləndiyinə və seçildiyinə görə məntiqlə biz onu böyük hərflə yazmalıyıq.

Bu sözləri Kult.az-a AMEA-nın Azərbaycan Milli Elmlər Akademiyasının (AMEA) Orfoqrafiya Komissiyası və AMEA Nəsimi adına Dilçilik İnstitutu tərəfindən hazırlanan Azərbaycan dilinin orfoqrafiya qaydalarının layihəsini şərh edən dilçi alim Şahlar Məmmədov deyib. O bildirib ki, “Allah” sözündə xüsusiləşmə var:

“Bəzən bu sözə sinonim olaraq “xaliq” sözü işlənir. Bu da “xəlq edən” deməkdir. “Xaliq” sözünü də bu mənada böyük hərflə yazmaq olar. Bu sözlərin böyüklə yazılması doğru qərardır”.

Məsələ ilə bağlı danışan ilahiyyatçı Elşad Miri isə bildirib ki, “Allah” sözünün böyük və ya kiçik hərflə yazılması heç bir məna kəsb eləmir:

“Ərəb dilində yaradanın və səmavi kitabların adlarının yazılmasında böyük və ya kiçik hərflə yazılma anlayışı yoxdur. Hamısı kiçik hərflə yazılır. Mən “Allah” və dini kitabların adını da böyük hərflə yazıram. Amma bəziləri “ilah” sözünü “Allah” sözü ilə qarışdırdıqlarına görə “ilah”, “tanrı” “Allah” sözlərini balaca hərflə yazaraq eyniləşdirirlər. Belə yazılış doğru deyil. Buna da səbəb həmin sözlər arasında fərqi bilməməkdir. “Allah” sözünün böyük hərflə yazılması təklifinə görə təşəkkür edirəm. Məncə, bu sözlərin böyük və ya kiçik yazılmasını deyil, nəzərdə tutulanın mahiyyətini bilmək önəmlidir”.

Qeyd edək ki, Azərbaycan Milli Elmlər Akademiyasının (AMEA) Orfoqrafiya Komissiyası və AMEA Nəsimi adına Dilçilik İnstitutu tərəfindən hazırlanan Azərbaycan dilinin orfoqrafiya qaydalarının layihəsində “Allah” sözünün və səmavi kitabların adınlarının böyük hərflə yazılmalı olduğu təklif edilib.