Martın 12-də Azərbaycan Milli Elmlər Akademiyasının Tarix İnstitutu və Misir Ərəb Respublikasının ölkəmizdəki səfirliyinin Mədəniyyət və Təhsil Əlaqələri Mərkəzinin birgə təşkilatçılığı ilə Azərbaycan Xalq Cümhuriyyətinin 100 illiyinə həsr olunmuş beynəlxalq konfrans keçiriləcək.

Tarix İnstitutundan Kult.az-a verilən məlumata görə, bu barədə qərar institutun Elmi Şurasının iclasında qəbul olunub. İnstitutun direktoru, akademik Yaqub Mahmudovun sözlərinə görə, institutun bəzi nəşrləri yaxın müddətdə başqa dillərdə çap olunacaq:

“Tarix İnstitutunun nəşrləri olan “Qarabağ: real tarix, faktlar, sənədlər” və “İrəvan xanlığı: Rusiya işğalı və ermənilərin Şimali Azərbaycan torpaqlarına köçürülməsi” kitabları ərəb dilində də çap olunub. Bu yaxınlarda “İrəvan xanlığı” kitabı türk və alman dillərində də çap olunacaq”.

İclasda qonaq qismində iştirak edən Misir Mədəniyyət və Təhsil Əlaqələri Mərkəzinin direktoru Əhməd Sami Elaydi Misir Mədəniyyət Mərkəzinin Tarix İnstitutu ilə sıx əməkdaşlıq etdiyini deyib:

“Mərkəzin kitabxanasında xeyli sayda ərəb dilində kitablar, o cümlədən tarixi mənbələr var. 2017-ci ildə kitabxanamız adından on min elektron kitabı instituta təqdim etmişik”.

Qeyd edək ki, Misir Mədəniyyət və Təhsil Əlaqələri Mərkəzi Azərbaycanda ilk və yeganə ərəb mədəniyyət mərkəzidir.