Millət vəkili Qənirə Paşayeva və “Aprel 2016: Şəhid ailələrinə dəstək” İB Xızı, Xaçmaz və Neftçalada Aprel döyüşlərinin qəhrəman şəhidlərinin ailələrini ziyarət ediblər.

Kult.az xəbər verir ki, Q.Paşayeva Xaçmazda qəhrəman şəhidlərimiz Elvin Mirzəyev və Elvin Qayıbovun, Xızıda Ravil Novruzovun, Neftçalada Elimdar Səfərovun ailəsini ziyarət edən zaman şəhidlərimiz kimi, onların ana-atalarının da ölkə üçün dəyərli olduğunu bildirib.

Prezidentin Aprel zəfəri ilə bağlı fikirlərinə xüsusi diqqət ayıran millət vəkili Q.Paşayeva, böyüyən gənclərimizin qəhrəman şəhidlərimizi daha yaxından tanıması və örnək alması üçün işlərin daha da artacağına inandığını deyib.

“Aprel 2016: Şəhid ailələrinə dəstək” İB həmtəsisçisi, qəhrəman şəhidimiz Raquf Orucovun həyat yoldaşı Sevinc Alızadə, digər həmtəsisçi, tanınmış jurnalist Aida Eyvazlı da yeni yaratdıqları təşkilatın qəhrəman şəhidlərimizin gənclər arasında daha çox təbliğ olunması istiqamətində işlər görəcəyini bildiriblər.