Azərbaycan Dillər Universitetində (ADU) ABŞ Dövlət Departamentinin Önəmli Dil Təqaüdü (ÖDT) Proqramı üzrə Azərbaycan dilini öyrənmək məqsədi ilə ölkəmizə gəlmiş 5 amerikalı tələbə üçün yay məktəbi fəaliyyətə başlayıb.

Kult.az xəbər verir ki, yay məktəbinin tələbələri ilə görüşən ADU-nun Beynəlxalq əlaqələr üzrə prorektoru professor Jalə Qəribova onları Dillər Universitetində görməkdən məmnun olduğunu bildirib.

Amerika Şurasının ölkə direktoru Jodi Blankenşip və amerikalı tələbələrlə iş üzrə rezident direktoru David Gibson uzun illərdir davam edən layihə haqqında danışıb və öncəki layihələrin yüksək səviyyədə təşkil olunduğunu, tələbələrin lazımı biliklərə yiyələndiklərini söyləyiblər.

Daha sonra amerikalı tələbələr Azərbaycan haqqında ilkin fikirlərini bölüşüblər.

Qeyd edək ki, intensiv dil təlimi və təşkil olunmuş mədəni maarifləndirici təcrübə təqdim edən “Yay məktəbi” iyunun 3-dən avqustun 3-nə kimi davam edəcək.