Metroda öz geyimi və hərəkətlərinə görə digər sərnişinlərin aqressiyası ilə üzləşən və son günlər sosial şəbəkə istifadəçiləri arasında diskussiyalara səbəb olan qızı Bakı Metropoliteninin polisi axtarır.

Axar.az xəbər verir ki, bu barədə "Sputnik Azərbaycan" hüquq-mühafizə orqanlarına istinadla məlumat yayıb.

Qeyd edək ki, bu günlərdə sosial şəbəkələrdə Bakı metrosunun qatarında çəkilmiş video yayılıb. Videoda qısa şortik geyinən qızın hərəkətlərinin digər sərnişinlər tərəfindən şiddətlə qınandığı görünür. Sərnişinlər qızı təhqir edərək ədəbsizlikdə günahlandırırlar və bildirirlər ki, azərbaycanlı qız bu formada küçəyə çıxmamalıdır. Qız isə özünü müdafiəyə qalxaraq cavab verir ki, mən beləyəm, siz mənə nə edəcəksiz?

Bu münaqişədən bir müddət sonra kosmetoloq Elnarə Rzayeva belə bir informasiya yayıb ki, həmin qız metrodakı münaqişədən sonra intihar edib.

Əslində isə həmin qız sağ-salamatdır.

Bakı Metropoliteni QSC-dən bildirildi ki, polisdən onlara bu haqda hər hansı məlumat verilməyib.