Paytaxtın Nəsimi rayonu 20 Yanvar küçəsi 237/241 ünvanında yerləşən bu beşmərtəbəli yaşayış binasının divar hissəsinə vurulan şiferlər sakinlər üçün təhlükə yaradır.

"Xəzər Xəbər"in məlumatına görə, küləyin təsirindən şiferlərin bir hissəsi qoparaq yerə düşsə də, digər hissələr hələ də divarda qalmaqdadır. Güclü külək əsən zaman şiferlər tərpənməyə başlayır ki, bu da hər an onların qopmasına səbəb ola bilər.

Sakinlərin sözlərinə görə, təhlükə səbəbindən uşaqları nə həyətə çıxara bilirlər, nə də özləri həmin ərazidən keçə bilirlər. Çünki hər an həmin şiferlər uçaraq sakinlərə və park edilən avtomobillərə zərər verə bilər.

Nəsimi rayon 77 saylı Mənzil İstismarı Sahəsinin mühəndisi Maşallah Camalov bildirdi ki, problem tezliklə aradan qaldırılacaq.

Qeyd edək ki, həmin şiferlər yaşayış binası tikilən zaman yağış və küləkdən divarları qorumaq üçün vurulub.