Daxili işlər orqanlarının əməkdaşları oğurluqla məşğul olan şəxslərin tutulması istiqamətində uğurlu əməliyyat tədbirini davam etdirirlər.

Daxili İşlər Nazirliyinin mətbuat xidmətindən Axar.az-a bildiriblər ki, oğurluq etdiyinə görə tutulmuş C.Nəzərovun ətrafında Xəzər Rayon Polis İdarəsinin 3-cü Polis Bölməsinin əməkdaşları tərəfindən aparılmış əməliyyat tədbirləri ilə onun rayondakı bir evdən pul və qızıl sırğa, bir evdən 140 manat və 360 manat dəyərində qızıl-zinət əşyaları, bir evdən isə 400 manat və qızıl üzük oğurlaması da müəyyənləşdirilib.

Mingəçevir Şəhər Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində sentyabrın 15-nə keçən gecə şəhərdəki körpələr evi-uşaq bağçasından məişət əşyaları oğurlamaqda şübhəli bilinən Şuşa rayon sakini İ.Rzayev yaxalanıb.

Yevlax Rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində sentyabrın 14-də rayon sakini olan bir qadının içərisində pul olan çantasını oğurlamaqda şübhəli bilinən şəhər sakinləri E.Məmmədov və bir yeniyetmə saxlanılıblar.

Hər üç faktla bağlı araşdırmalar davam etdirilir.