Qəbələdə ölümlə nəticələnən yol-nəqliyyat hadisəsi ilə bağlı "Xəzər-xəbər" süjet yayıb.

Axar.az xəbər verir ki, hadisə Qaraməryəm-İsmayıllı-Şəki yolunun Qəbələ rayonundan keçən ərazisində qeydə alınıb. Qəbələ rayon, Vəndam qəsəbə sakini, 17 yaşlı Ramin Lətifli idarə etdiyi avtomobillə İsmayıllı istiqamətində hərəkətdə olarkən idarəetməni itirərək avtomobili yolun kənarında olan ağaca çırpıb.

Nəticədə sürücü Ramin Lətifli aldığı xəsarətlərdən hadisə yerində ölüb, avtomobildə olan sərnişin, Qəbələ rayon Vəndam qəsəbə sakini, 19 yaşlı Şəhriyar Xəlilov isə müxtəlif bədən xəsarətləri ilə Qəbələ rayon Mərkəzi Xəstəxanasına yerləşdirilib.

Xəsarət alaraq xəstəxanaya yerləşdirilən şəxslərdən biri - Ziyadxanov Ziya Pünhan oğlu Vəndam qəsəbə məktəbinin 10-ci sinif şagirdidir. Digər yaralılar - Xəlilov Şəhriyar Mübariz oğlu isə Azərbaycan Dövlət Aqrar Universitetinin, Cabayev Murad Sərxan oğlu isə Xəzər Universitetinin tələbəsidir.

Qəzada həyatını itirən 17 yaşlı Ramin Lətifli isə Azərbaycan Memarlıq və İnşaat Universitetinin 1-ci kurs tələbəsidir.

Faktla bağlı araşdırma aparılır.