Abşeronda şirniyyat adı ilə şagirdlərə xüsusi qablarda maddələr verilib. Hadisə rayonun Masazır qəsəbəsi, Cantəpə adlanan ərazisində baş verib.

Axar.az Baku Tv-yə istinadən xəbər verir ki, ərazidə Kəlbəcər rayon 56 nömrəli tam orta məktəb var. İddia olunur ki, naməlum şəxs və ya şəxslər şagirdlərin gedib-gəldiyi yolu qəsdən seçiblər.

56 nömrəli məktəbin direktor müavini Nizami Əsgərov məsələdən xəbər tutan kimi hüquq-mühafizə orqanlarına məlumat verdiyini deyir.

Məsələni Daxili İşlər Nazirliyi nəzarətə götürüb. Nazirlikdən bildirilib ki, şagirdlərə şirniyyat adı altında xüsusi maddə payladığı iddia olunan şəxs artıq Binəqədi Rayon Polis İdarəsinin 6-cı polis bölməsi əməkdaşları tərəfindən şübhəli şəxs qismində saxlanılıb. Həmin qabda olan maddənin nə olduğunu araşdırmaq üçün ekspertiza təyin olunub. Cavab çıxandan sonra məsələyə hüquqi qiymət veriləcək.