2023.06.02. 20:39

Hindistanda sərnişin qatarı ilə yük qatarı toqquşub.

Axar.az xəbər verir ki, bu barədə NDTV məlumat yayıb.

Qəzanın yerli vaxtla saat 19:20-də Balasor şəhəri yaxınlığında baş verdiyi bildirilib. Hadisə nəticəsində 8 vaqon relsdən çıxıb, 50 nəfər ölüb, 400-ə yaxın sərnişin yaralanıb.

Sərnişin qatarı Kəlküttədən Çennaya gedirmiş.

Hadisə yerinə xilasedicilər cəlb edilib.

***

Qatarların toqquşması nəticəsində ölənlərin sayı 70-ə çatıb.

Bu barədə yerli media məlumat yayıb.

Yerli sakinlər isə ölənlərin sayının 100-ə çatacağını istisna etmir.

***

Qatarların toqquşması nəticəsində ölənlərin sayı 80-ə çatıb.

Bu barədə “Röyters” məlumat yayıb.

Yaralıların sayı isə 850 nəfər təşkil edir.

***

Hindistanda qatarların toqquşması nəticəsində ölənlərin sayı 120 nəfəri ötüb.

Bu barədə Hindistanın ANI agentliyi hadisənin baş verdiyi Odişa ştatının yanğınsöndürmə xidmətinin rəhbəri Sudhanşa Sarangiyə istinadən məlumat yayıb.

“120-dən çox cəsəd tapdıq, qurbanların sayı arta bilər”, - o deyib.

***

Hindistanda qatarların toqquşması nəticəsində ölənlərin sayı 288 nəfərə çatıb.

Bu barədə “Röyters” məlumat yayıb.

Qeyd olunub ki, yaralananların sayı təxminən 900 nəfərə yaxındır.

Hindistanın Odişa ştatının hakimiyyət orqanları Balasore şəhəri yaxınlığındakı Bahanaq dəmir yolu stansiyası ərazisində qatarların toqquşması nəticəsində çoxsaylı insan ölümü ilə əlaqədar bir günlük matəm elan edib. Şənbə günü ştatda bütün şənlik və əyləncə tədbirlərinin keçirilməsi qadağandır.

Dəmir Yolları Nazirliyi qəzada ölənlərin yaxın qohumlarına 1 milyon rupi (12 min ABŞ dolları), ağır yaralananlara 200 min rupi (2400 ABŞ dolları), yüngül xəsarət alanlara isə 50 min rupi (604 ABŞ dolları) təzminat ödəyəcəyini açıqlayıb.

Qəza yerində xilasetmə işləri davam edir. Onlara 500-dən çox insan cəlb olunub.